Newid trwydded rhywogaeth

Dylid cwblhau'r ffurflen hon i gefnogi cais i ddiwygio trwydded rhywogaeth sydd eisoes mewn grym ar gyfer cynnal arolwg, gwaith cadwraeth neu ddatblygu a roddwyd o dan:

• Reoliadau Cadwraeth Cynefinoedd a Rhywogaethau 2017
• Ddeddf Bywyd Gwyllt a Chefn Gwlad 1981
• Deddf Gwarchod Moch Daear 1992

Gellir gwneud cais am y newidiadau canlynol drwy ddefnyddio’r ffurflen hon:

• Newidiadau i fanylion cyswllt personol y trwyddedai a/neu’r ecolegydd enwebedig
• Newidiadau i’r asiantau achrededig
• Newidiadau i’r technegau neu’r offer ar eich trwydded arolwg neu drwydded cadwraeth
• Newidiadau i’r rhywogaeth(au) a gwmpesir gan y drwydded
• Newidiadau i’r fethodoleg waith / Datganiad Dull cytunedig
• Newidiadau i’r amserlen waith
• Newidiadau i’r Cynllun Rheoli cytunedig
• Newidiadau eraill

Sylwer mae angen ffurflen wahanol ar gyfer y newidiadau canlynol:

• Newid y Trwyddedai – peidiwch â defnyddio’r ffurflen hon, ond defnyddiwch ein ffurflen newid trwyddedai (yn agor mewn tab newydd)
• Newid yr Ecolegydd Enwebedig (trwyddedau datblygu a chadwraeth yn unig) – peidiwch â defnyddio’r ffurflen hon, ond defnyddiwch ein ffurflen newid Ecolegydd Enwebedig (yn agor mewn tab newydd)

Cysylltwch â ni er mwyn penderfynu a all gwaith o dan eich trwydded bresennol barhau tra bo’ch cais am ddiwygiad yn cael ei brosesu. Ceir senarios penodol a fyddai’n gwneud eich trwydded bresennol yn annilys, felly gofynnwn ichi gadarnhau hyn cyn parhau â’r gwaith.

Os yw eich trwydded bresennol wedi dod i ben, ni chewch ymgymryd â gwaith pellach o dan y drwydded hon nes eich bod wedi cael y drwydded ddiwygiedig.

Os daeth eich trwydded bresennol i ben dros bedair wythnos cyn cyflwyno'r cais hwn i ddiwygio a'ch bod yn ceisio diwygio'r gwaith y gellir cael trwydded ar ei gyfer, dylech ailymgeisio yn llawn.
 

Os yw eich trwydded yn dod i ben o fewn pedair wythnos i gyflwyno’r ffurflen gais am ddiwygiad hon, bydd angen i chi gwblhau a chyflwyno ffurflen Adroddiad ar Rywogaethau a Warchodir gan Ewrop mewn perthynas â’r drwydded hon; mae’r ffurflen hon ar gael ar ein gwefan (yn agor mewn tab newydd).

Byddwch yn ymwybodol, os ydych yn gwneud cais i ddiwygio unrhyw waith trwyddedadwy (ac eithrio newidiadau i unrhyw amodau ar ôl cwblhau gwaith), a bod dros bedair wythnos wedi mynd heibio ers i’ch trwydded ddod i ben, na fyddwn yn gallu diwygio eich trwydded ac y bydd angen i chi gyflwyno cais newydd.

Byddwch yn ymwybodol, os ydych yn bwriadu gwneud newidiadau sylweddol i’r fethodoleg a gytunwyd gan CNC o dan eich trwydded cadwraeth neu drwydded datblygu bresennol, mae’n bosibl na fyddwn yn gallu diwygio eich trwydded. Yn lle hynny, mae’n bosibl y gofynnwn ichi gyflwyno cais newydd yn ei gyfanrwydd.